Lúðrasveit Þorlákshafnar

Þar sem himinn ber við haf

2012-02-06T09:50:00.002Z

Kæru aðdáendur, nú þegar nýliðnir eru hinir árlegu nýárstónleikar Lúðrasveitar Þorlákshafnar viljum við meðlimir sveitarinnar þakka fyrir frábæra aðsókn og undirtektir. Við erum full þakklætis fyrir alla þá sem hafa stutt okkur beint og óbeint á síðustu misserum. Þetta er okkur sannarlega hvatning til áframhaldandi góðra (tón) verka.

Sveitin hefur nú þegar hafið undirbúning og æfingar á næsta verkefni sem er án efa það stærsta sem hún hefur ráðist í frá upphafi. Fyrirhugað er að gefa út plötu með Jónasi Sigurðssyni og frumflytja það efni um sjómannadagshelgina. Verkefnið ber yfirskriftina þar sem himinn ber við haf og er óður til Þorlákshafnar og annarra íslenskra sjávarþorpa.

Verkið á að vera upplifun fyrir öll skynfæri, þar sem margir ólíkir listrænir þættir tvinnast saman. Þegar nær dregur munum við upplýsa ykkur nánar um verkefnið en þangað til getið þið haft bein áhrif á þróun þess með því að versla af okkur harðfisk á niðursettu verði. Hægt er að nálgast hann til hvaða meðlims sveitarinnar sem er.

Enn og aftur þökkum við stuðninginn, án ykkar værum við ekkert!

Nýárstónleikar 2012

2012-01-04T11:20:00.000Z

Lúðrasveit Þorlákshafnar heldur nýárstónleika annað árið í röð laugardaginn 7. janúar kl. 17:00.

Áheitaganga Lúðrasveitar Þorlákshafnar

2011-06-02T13:12:00.002Z

Laugardaginn 21. maí, gekk Lúðrasveit Þorlákshafnar áheitagöngu frá Þorlákshöfn til Hveragerðis. Alla leiðina voru hljóðfærin á lofti og ýmis góð göngulög spiluð til að halda uppi hraðanum. Lagt var af stað frá Grunnskóla Þorlákshafnar um klukkan tíu og var ekkert stoppað fyrr en komið var að Læk í Ölfusi. Þar tóku heiðurshjónin Jón Hjartarson og Sigurhanna Gunnarsdóttir á móti sveitinni með glæsilegum veitingum í fallega garðinum sínum.

Veðurspáin hafði valdið meðlimum sveitarinnar töluverðum áhyggjum þar sem útlit var fyrir mikinn kulda og rok. Veðurguðirnir voru hins vegar með í för því það var glampandi sól alla leið, þó svo það hafi blásið hressilega á köflum. Lúðrasveitin endaði göngu sína í sundlauginni í Laugaskarði þar sem Jóhanna Hjartardóttir tók á móti göngugörpunum.

Á sundlaugarbakkanum lék Lúðrasveitin nokkur lög og fór svo í pottinn þar sem heita vatnið lék við lúna fætur. Eftir sundið var borðað á Hoflandssetrinu þrátt fyrir mikið át allan daginn en í miðju Ölfusinu kom Víking pizza færandi hendi með pizzur handa öllum og Rán okkar bakaði kleinur ofan í allan mannskapinn. Nóg var af vatni frá Icelandic Waterholdings sem og orkudrykkjum frá Vífilfelli.

Gangan gekk eins og í sögu og voru gengnir um 23 kílómetrar á 4,5 klukkutímum. Þátttakendur í göngunni voru rúmlega 30 og skemmtu göngugarpar sér konunglega við spilamennskuna. Þórður Njálsson fylgdi sveitinni á rútu frá Guðmundi Tyrfingssyni og fá þeir sérstakar þakkir fyrir framlag sitt. Að lokum vilja meðlimir sveitarinnar þakka öllum þeim sem studdu við bakið á lúðrasveitinni með einum eða öðrum hætti. Bæjarbúar, vinir, fyrirtæki, ættingjar og allir hinir, takk kærlega fyrir stuðninginn.

Kær kveðja frá Lúðrasveit Þorlákshafnar :)

Það eru engir lúðar í lúðrasveit

2011-05-20T12:55:00.000Z

Úr Dagskránni, fimmtudaginn 19. maí 2011

Á fimmtudagskvöldum koma saman á fimmta tug manna sem vinna dags daglega við hin ýmsu störf. Þar má finna rafvirkja, hjúkrunarfræðing, sjómann, hárgreiðslukonu, viðskiptafræðinga, háskólanema, kennara og svo mætti lengi telja. Eitt eiga þau öll sameiginlegt, það er að einhvern tímann hafa þau lært á hljóðfæri og nota þá þekkingu til þess að spila með Lúðrasveit Þorlákshafnar. Þar er reyndar líka að finna mikið menntað tónlistarfólk sem spilar orðið víðar en hefur aldrei sagt skilið við Lúðrasveitina, þetta er bara svo frábær hópur!

Lúðrasveitin er orðin 27 ára en hún var stofnuð árið 1984 og hefur Robert A. Darling stjórnað henni nánast óslitið frá upphafi. Undanfarið hefur verið mikill uppgangur í sveitinni og einkennist hann helst af metnaðarfullum verkefnum og nýjum meðlimum sem bætast í hópinn. Sem dæmi um verkefni á þessu ári má nefna nýárstónleika 2. janúar sl. sem 240 manns komu og sáu og samstarfsverkefni með Lúðrasveit Reykjavíkur þar sem sveitirnar leiddu saman lúðra sína og sameinuðust í 80 manna stórhljómsveit sem hélt tvenna tónleika í mars, aðra í Langholtskirkju í Reykjavík og hina í Íþróttahúsi Þorlákshafnar.

Lúðrasveit Þorlákshafnar prúðbúin á Nýarstónleikum 2. janúar 2011

Framundan eru spennandi tímar hjá sveitinni því enn ætlum við að fara ótroðnar slóðir og reyna að toppa það sem við höfum áður gert. Næsta vetur ætlum við í samstarf með Jónasi Sigurðssyni sem átti meðal annars lag ársins „Hamingjan er hér“. Um er að ræða nýtt efni sem flutt verður í tónleikaröð og gefið út á plötu. Það er sérstaklega ánægjulegt að segja frá því að við fengum styrk frá Menningarráði Suðurlands og Tónskáldasjóði Rásar tvö fyrir þetta verkefni.

Laugardaginn 21. maí næstkomandi ætlar Lúðrasveit Þorlákshafnar að spila gangandi (marsera) frá Þorlákshöfn til Hveragerðis og er hún að safna áheitum fyrir gönguna í fjáröflunarskyni. Ef þig langar til þess að heita á sveitina getur þú haft samband við Helgu í síma 862-0940 eða sent tölvupóst á katrinoskh@gmail.com. Einnig er tilvalið að fá sér bíltúr um Ölfusið á laugardaginn og hlusta á fagra tóna Lúðrasveitarinnar.

Þess má geta að lagt verður af stað kl. 10 frá Grunnskóla Þorlákshafnar og vill Lúðrasveitin þakka sérstaklega Guðmundi Tyrfingssyni og Þórði Njálssyni fyrir sitt framlag ásamt öllum þeim sem þegar hafa heitið á okkur.

Að lokum viljum við hvetja alla þá sem einhvern tímann hafa spilað á blásturshljóðfæri að dusta rykið af lúðrinum og slást í för með næstu lúðrasveit, hvort sem það er Lúðrasveit Þorlákshafnar eða einhver önnur, þetta er bara svo mikið stuð og frábær næring fyrir sálina!

F. h. Lúðrasveitar Þorlákshafnar,

Ása Berglind Hjálmarsdóttir

Áblástur 2011

2011-03-24T09:55:00.005Z

Lúðrasveit Þorlákshafnar og Lúðrasveit Reykjavíkur leiða saman lúðra sína og sameinast í 80 manna hljómsveit.

Saman munu þau halda tvenna tónleika: Í Langholtskirkju í Reykjavík sunnudaginn 27. mars kl. 17 og í Íþróttamiðstöð Þorlákshafnar mánudaginn 28. mars kl. 20.

Verkin á efnisskránni eru:

OVERTURE JUBILOSO eftir Frank Erickson, HEBRIDES SUITE eftir Clare Grundman, RUSSIAN CHRISTMAS MUSIC og FIFTH SUITE FOR BAND eftir Alfred Reed, LA DANZA eftir Gioacchino Rossini og hin glæsilega svíta Gustav Holst, FIRST SUITE IN Eb. Öll þessi verk eru vel þekkt og skrifuð fyrir stóra blásarasveit.

Stjórnendur á tónleikunum eru Róbert A. Darling og Lárus Halldór Grímsson.

Aðgangseyrir 1.500 krónur

Jólatónleikar

2009-12-04T13:07:00.001Z

Æskan er æði - tvennir tónleikar

2009-04-14T17:54:00.000Z

Lúðrasveit Þorlákshafnar hefur frá áramótum unnið að verkefni þar sem nemendur Tónlistarskóla Árnesinga fá að njóta sín í einleiksverkum af ýmsum toga. Verkefnið er styrkt af Menningarráði Suðurlands og er eitt það viðamesta sem lúðrasveitin hefur ráðist í á 25 ára ferli sínum.

Efnisskrá tónleikanna er mjög fjölbreytt og ættu allir að finna eitthvað við sitt hæfi, meðal annars má nefna íslensk dægurlög, frumsamin lúðrasveitaverk og Czardas eftir Vittorio Monti. Frumflutt verða tvö verk eftir Róbert A. Darling, stjórnanda sveitarinnar sem heita Kvartaldarmars og Skrúðganga spákaupmannanna. Alls koma 13 nemendur tónlistarskólans fram á tónleikunum, ýmist einir eða í hópum, auk 75 ungmenna í barna- og unglingakór Selfosskirkju undir stjórn Editar Molnár.

„Æskan er æði“ er yfirskrift tónleikanna sem verða haldnir bæði á Selfossi og í Þorlákshöfn sem hér segir:

Fimmtudaginn 23. apríl kl. 15:00 í Sunnulækjarskóla á Selfossi
Sunnudaginn 26. febrúar kl. 15:00 í Ráðhúsi Ölfuss

Stanslaus blástur í aldarfjórðung

2009-04-06T21:19:00.000Z

-Birt í Bæjarlífi, mars 2009 -

Frá afmælisæfingunni í febrúar. Föngulegur hópur þó vanti örfáa meðlimi.
Róbert Darling stjórnandi er fremstur frá hægri og við hlið hans Ása Berglind Hjálmarsdóttir, formaður lúðrasveitarinnar.
Ljósmynd: Davíð Þór Guðlaugsson.

Lúðrasveit Þorlákshafnar náði þeim merka áfanga að verða 25 ára 23. febrúar sl. Haldið var upp tímamótin með æfingu og síðan ljúffengum kvöldverði á Svarta sauðnum.

Sögu Lúðrasveitar Þorlákshafnar má sem sé rekja aftur til ársins 1984. Þá komu nokkrir þorlákshafnískir hljóðfæraleikarar sér saman um að stofna lúðrasveit fyrir tilstilli Lions klúbbsins. Það þætti kannski einhverjum öðrum galin hugmynd í ekki stærra bæjarfélagi en þá var og er í sjálfu sér enn, en þarna er „persónuleika“ lúðrasveitarinnar best lýst; kraftur, þor og áræðni.

Róbert Darling var fyrsti stjórnandinn og hefur hann stjórnað sveitinni nánast óslitið síðan. Að auki eru tveir meðlimir sem alltaf hafa staðið vaktina en það eru þeir Hermann Jónsson básúnuleikari og Gestur Áskelsson saxófónleikar. Þeir eiga einnig skilið hrós fyrir mikla vinna og úthald. Ófáir harðfullorðnir meðlimir hafa verið með frá barnsaldri.

Æft er hvern fimmtudag og aka þó nokkrir á æfingar nánast hvernig sem viðrar frá sveitarfélögunum í kring og Reykjavíkursvæðinu.

Viðfangsefni Lúðrasveitarinnar hafa verið fjölbreytt í gegnum árin og sífellt eykst metnaðurinn. Sveitin hefur ekki einungis fengist við að spila hefðbundna lúðrasveitatónlist sem flestir kannast við í kringum hin ýmsu hátíðahöld, heldur hafa þekktir poppslagarar sem og sígild stórverk fengið að njóta sín í auknum mæli. Má einkum upplifa þá spilamennsku á árlegum jóla- og vortónleikum sveitarinnar.

Fyrstu árin

Eins og elstu menn muna stóð lúðrasveitin fyrir eigin hátíðarhöldum um árabil. Hátíðin var kölluð Þorláksvaka og var gríðarlega vinsæl. Þá hafa reglulega verið haldin fjölsótt bingó. Svo hafa meðlimir farið í æfingarferðalög, bæði innanlands og utan auk þess að sækja fjölmörg Landsmót íslenskra lúðrasveita sem ávallt reynast hin besta skemmtun.

Í september sl. hélt lúðrasveitin Landsmót íslenskra lúðrasveita. Mótið var haldið hér í Þorlákshöfn að sjálfsögðu og tókst í alla staði mjög vel. Um 100 hljóðfæraleikarar mættu til leiks víðsvegar að af landinu úr 7 lúðrasveitum og var ekkert slegið af, spilað bæði dag og nótt!

Síðustu jólatónleikar voru mjög vel lukkaðir í samstarfi við Söngfélag Þorlákshafnar og Söngsveit Hveragerðis. Í vor verður svo ráðist í sérstaklega metnaðarfullt verkefni. Um er að ræða tónleika þar sem lúðrasveitin mun að mestu annast undirleik hjá ýmsum einleikurum úr Árnessýslu, bæði í léttari og þyngri verkum. Æfingar fyrir þetta verkefni eru langar og strangar, en hópurinn er samheldinn og stjórnandinn límið.

Félagar í Lúðrasveit Þorlákshafnar eru nú um 30. Mikil fjölgun hefur orðið á ný í sveitinni undanfarin ár og hefur tekist vel að fá gamla meðlimi til að dusta rykið af hljóðfærum sínum og spila með.

Það er ekki sjálfgefið að halda úti lúðrasveit og það gæðabandi sem þessu í jafn fámennu byggðarlagi og Þorlákshöfn en Róbert Darling hefur drifið starfið áfram af miklum krafti og á hann heiður skilinn fyrir það.

Þó nokkrir ungir og efnilegir hljófæraleikarar hér í Þorlákshöfn eru alveg að komast á aldur fyrir sveitina. Verður gaman að þeirri nýliðun. Þess vegna lifir lúðrasveitin vonandi í áratugi í viðbót. Til hamingju með afmælið!

Takk fyrir frábært landsmót

2008-10-01T14:40:00.000Z

Við viljum þakka öllum þeim hljóðfæraleikurum og stjórnendum sem sóttu okkur heim síðastliðna helgi kærlega fyrir komuna. Allt gekk þetta með eindæmum vel og var ekki annað að sjá en fólk skemmti sér konunglega. Við vonum auðvitað, og erum sannfærð um, að landsmótið í Þorlákshöfn verði eftirminnilegt og á allra vörum þegar fram líða stundir. Þeir sem ekki tóku þátt verða víst að lifa með því og bæta úr þegar kemur að næsta landsmóti.

Til að halda stemningunni gangandi væri gaman ef þátttakendur sendu okkur myndir af landsmótinu (ludrasveitin@gmail.com). Eins má senda vefslóðir á myndir sem þegar eru komnar á netið. Þannig gætum við búið til skemmtilegan myndabanka á þessari síðu.

Landsmót Lúðrasveita helgina 26-28. september

2008-09-23T11:13:00.000Z

19. landsmót Sambands íslenskra lúðrasveita verður haldið í Þorlákshöfn dagana 27. og 28. september. Lúðrasveit Þorlákshafnar á veg og vanda að skipulagningu mótsins og eru þátttakendur í kringum 100.

Landsmótin hafa verið haldin á 3-4 ára fresti, nú síðast í Vestmannaeyjum árið 2004. Hingað til hefur sá háttur verið hafður á að lúðrasveitirnar spili hver í sínu lagi, en að þessu sinni var ákveðið að blanda öllum þátttakendum saman. Hópnum verður svo skipt upp í tvær stórar hljómsveitir þar sem hljóðfæraleikarar úr öllum lúðrasveitunum mætast. Þetta fyrirkomulag krefst þess ekki að þátttakendur séu virkir lúðrasveitameðlimir heldur geta allir áhugasamir komið og verið með, t.d. gamlir lúðrasveitafélagar. Einnig auðveldar þetta litlum hljómsveitum að taka þátt.

Landsmótinu lýkur með tónleikum sem haldnir verða í Íþróttamiðstöðinni í Þorlákshöfn sunnudaginn 28. september kl. 13:30. Ekkert kostar inn á tónleikana sem eru opnir almenningi.